تعالوا نتعلم الفوتوشوب

معظم الناس بتشوف ان برنامج فوتوشوب برنامج صعب و معقد بس انا بحبه
جدا وهبدأ انزل شرح مبسط له على ادى يارب يعجبكوا و تستفيدوا منه
نسمى الله ونبدأ مع بعض نتعرف على واجهة البرنامج





- 1 - شريط القوائم : وده موجود فى اعلى واجهة البرنامج ومقسم الى 9 قوائم
القوائم دى موجود فيها كل اوامر البرنامج وهنشرحها بالتفصيل فى
درس لوحدها

- 2 - شريط الخيارات : موجود تحت شريط القوائم وفيه خانات بنحط فيها بعض القيم
المختلفه الخاصه ببعض أدوات البرنامج

- 3 - لوحة التجول فى الملف : بتدينا حريه الحركه فى ملف العمل والتنقل من مكان لمكان فيه ده الكلام النظرى بس انا عن نفسى ولا عمرى استخدمتها يعنى سيبكوا منها

- 4 - لوحة الألوان : موجود فيها كل درجات الألوان والأكواد الخاصه بيها

- 5 - لوحة الطبقات : ودى مهمه جدا جدا لان اى صوره بتتكون من عدة طبقات منفصله بنحطهم بالترتيب الى نحبه وكل طبقه بتظهر لنا فى سطر مستقل داخل لوحه الطبقات لما ندوس على طبقه منهم بتتنشط ونئدر نحركها زى منحب واى طبقه غير نشيطه لا تتأثر بالحركه وطبعا ترتيب الطبقات كمان ممكن نتحكم فيه ننزل سطر الطبقه تحت طبقه اخرى او نطلعها فوق وكمان الطبقات لها درس لوحدها بالتفصيل

- 6 - صندوق الأدوات : وهو موجود جهة اليسار بطول واجهة البرنامج ويشمل جميع ادوات البرنامج

- 7 - ملف العمل : وده المكان الى الصور بتتعمل فيه يعنى اى صوره بدايتها بتكون ملف عمل فاضى وبعدين نضيف احنا شوية طبقات على زوقنا ونرتبهم وفى النهايه يطلع التصميم الى احنا عايزينه


كده اتعرفنا على واجهة البرنامج واخدنا فكره عامه الدرس التالى هنبدأ نتعرف على صندوق الأدوات بالتفصيل وكمان هيكون فى ملف مفتوح للتدريب العملى